拉埋香港人落水,填埋下一代落海

拉埋香港人落水,填埋下一代落海

近期成日有人讲为咗香港下一代要填海,今日我唔想讲填海,剩係想讲下一代。

人呢一世或多或少都被父母、教育、社会、制度、朋友、同事等各种因素影响及定型,从而得出自己同大部人都能理解嘅一套「正常」或者各种标籤,但每一个人都係独立嘅个体,遗憾嘅係人同人係唔可能完全互相理解,你经历过嘅事同你嘅感受,喺呢个世界係冇另一个人同你完全一样,所以唔好随便因为人哋外表、衣着、髮色、纹身、甚至性格去判定或者标籤另一个人。不过你点去批判或者标籤其他人都唔係大问题,毕竟係人性嘅一环。正如我所讲,我想讲嘅係有关下一代。希望你唔好用呢一套价值观去教育或者批判自己下一代,令到佢成为一个同你拥有同一套价值观嘅人,咁讲并唔代表你呢一套价值观错误,而係你嘅小朋友并唔係你,佢应该有选择将来要做一个点嘅人,行一条点嘅路嘅权利。

如果你未有小朋友,谂清楚自己係咪真係有能力俾到佢选择嘅权利,讲紧嘅唔係剩係经济能力咁简单。唔好剩係为咗自己繁殖下一代嘅慾望或者责任而生育,佢自己想要嘅嘢,你可能呢一世都唔会知道。选择有小朋友之前,谂吓对你嚟讲真正嘅快乐係啲乜,喺呢个社会呢个世界呢一刻活着嘅你快乐吗?如果你嘅答案係唔快乐,咁请你考虑清楚,谂吓你嘅下一代将来又会快乐吗?就算你嘅答案係快乐,亦唔代表你嘅下一代将来会同你一样,因为佢想要嘅快乐可能同你想要嘅完全唔同。

如果你有小朋友,养儿一百岁,长忧九十九,担心嘅同时唔好限制咗佢嘅想法或者选择。只要唔係坏事,只要有合理嘅原因,佢想做嘅都应该支持佢;唔好强行灌输自己个一套俾自己小朋友,更加唔好帮佢谂埋点样先至係对佢最好,因为你冇可能知道对佢嚟讲点样先至係最好;唔好过份担心佢会受伤同失败,只要喺佢需要你扶佢一把嘅时候喺佢身边,咁就已经足够。睇到佢真正快乐,将会係你身为父母呢一生最大嘅幸福。

可能有一刻你会觉得含辛茹苦养大个小朋友,自己已经将最好嘅嘢俾哂佢,点解佢都唔听话唔生性?但做父母嘅咁样做唔係理所当然咩?何况可能佢想做嘅係一个足球员,但你觉得打篮球先会高就想佢学打篮球,到佢有勇气同你讲自己唔想再打,你就觉得佢唔听话唔生性。但你又有冇谂过,其实佢想行嘅路同你想佢行嘅路可以好唔同。再者,当初係你乜都冇问过佢就带佢嚟到呢个世界,真正一世都还唔清个个,可能係你自己。

上面讲嘅你唔锺意听嘅可以当係废话,毕竟你可能做多我好几年甚至几十人,已经有一套既定嘅生活方式同价值观。但係有一句嘢係一定啱嘅,有机会嘅多啲陪吓屋企人,上一辈下一代或者另一半都好,就算冇可能完全理解都尝试尽可能去了解对方。做人唔好剩係用眼睇,用口讲,多啲用耳听,理解吓人哋感受,易地而处;多啲用个脑思考,谂下自己想要嘅、需要嘅,对自己重要嘅又究竟係啲乜。人生匆匆,好多嘢贬下眼就冇。

最后想讲嘅係,你自己想点呢,只要唔影响到人,其实就冇乜所谓,但係真係唔好影响到人啰。

上一篇: 下一篇: